माहिती अधिकार फेडरेशनच्या बीड जिल्हा अध्यक्षपदी संपादक अजय भांगे यांची पुन्हा एकदा निवड
केज/सचिन भालेराव
माहिती अधिकार फेडरेशनचे संस्थापक अध्यक्ष सुभाष बसवेकर यांच्या आदेशानुसार व कार्याध्यक्ष शेखर कोलते यांच्या मार्गदर्शनाखाली बीड जिल्हा अध्यक्ष पदाच्या निवडीची प्रक्रिया पार पडली. या प्रक्रियेत दैनिक वादळ वार्ताचे संपादक व सामाजिक कार्यकर्ते अजय भांगे यांची एकमताने बीड जिल्हा अध्यक्षपदी पुन्हा निवड करण्यात आली.
गेल्या तीन वर्षांच्या कार्यकाळात अजय भांगे यांनी माहिती अधिकाराच्या माध्यमातून जिल्हा प्रशासनातील पारदर्शकता वाढवण्यासाठी उल्लेखनीय योगदान दिले आहे. त्यांच्या नेतृत्वाखाली शेकडो तरुणांना आरटीआय विषयक प्रशिक्षण व मार्गदर्शन मिळाले असून, अनेक प्रकरणांत जनहितासाठी त्यांनी लढे उभारले आहेत. माहिती अधिकार कार्यकर्त्यांचे सशक्त जाळे उभे करून त्यांनी फेडरेशनची ताकद लक्षणीयरीत्या वाढवली आहे.
फेरनिवडीनंतर आपली भावना व्यक्त करताना अजय भांगे म्हणाले,
“माहिती अधिकार हा लोकशाहीतील सामान्य नागरिकाचा प्रभावी हक्क आहे. प्रशासनातील अनियमितता उघडकीस आणत पारदर्शक व जबाबदार शासनव्यवस्था निर्माण करणे हेच आमचे ध्येय आहे.”
या फेरनिवडीबद्दल अजय भांगे यांचे सर्व स्तरांतून अभिनंदन होत असून, जिल्ह्यातील आरटीआय चळवळीला नवसंजीवनी मिळेल, असा विश्वास कार्यकर्त्यांमध्ये व्यक्त केला जात आहे.
